Nagbanta ang Department of Foreign Affairs (DFA) na posibleng putulin nito ang kontrata ng Pilipinas sa ilang mga kumpaniyang Tsino.
Ito’y sakaling mapatunayan ng Pilipinas na bahagi ang mga iyon ng pagtatayo ng mga artipisyal na istruktura sa mga pinag-aagawang teritoryo sa West Philippine Sea.
Ayon kay DFA Sec. Teodoro Locsin Jr, bubusisiin nilang maigi ang mga ginagawang aksyon ng China lalo’t maaari aniyang kasuhan ang Pilipinas dahil sa mga nakapasok nang kontrata nito.
Makikipag-ugnayan aniya sila sa Department of Transportation (DOTr) at National Economic and Development Authority (NEDA) upang alamin kung may mga inaprubahan o nagpapatuloy na proyekto ang Chinese partners ng Pilipinas na saklaw ng US sanction.
Magugunitang 24 na Chinese companies ang una nang pinatawan ng sanction ng Amerika dahil sa pakikilahok ng mga ito sa ginagawang militarisasyon ng China sa mga artipisyal na islang pinag-aagawan ng iba’t-ibang bansa kabilang na ang Pilipinas.
