Ibinunyag ng regional director ng Bangsamoro Police Regional Office ang di umano’y koneksyon sa drug syndicate ng isa sa mga sundalo na napatay ng mga pulis sa Jolo, Sulu noong Hunyo.
Batay anya ito sa drug matrix na iprinisinta ni Col. Michael Bawayan Jr., police director ng Sulu Provincial Police Office, sa pulong nila sa Armed Forces of the Philippines (AFP) Board of Inquiry kung saan kasama ang pangalan isa sa mga nasawi na si Corporal Adbal Asula.
Napatay rin di umano sa anti-illegal drugs operations ng Provincial Drug Enforcement Unit ang kapatid ni Asula noong ika-14 ng Marso, samantalang ilan pa sa kanyang mga kamag-anak ang naaresto.
Matatandaan na si Asula kasama ang tatlo pang army intelligence officers ang pinagbabaril ng mga pulis noong ika-29 ng Hunyo.
Nasa syam sa sangkot na mga pulis ay kinasuhan na murder.
Alegasyong konektado sa drug syndicate ang 1 sa 4 sundalo na napatay sa Sulo inalmahan
Umalma si Armed Forces of the Philippines (AFP) Chief of Staff Lt. General Gilbert Gapay sa alegasyon na sangkot sa illegal drug syndicate ang isa sa apat na sundalong pinatay ng mga pulis sa Jolo, Sulu noong ika-29 ng Hunyo.
Si Gapay ang hepe ng Philippine Army nang maganap ang insidente.
Sinabi ni Gapay na mayroon syang presentasyon sa senado upang kontrahin ang mga alegasyon laban kay Corporal Abdal sula.
Gayunman, hindi na ito napagbigyan ng senate committee on public order and illegal drugs dahil tinapos na ang hearing upang bigyang daan ang plenary session.
Gayunman, tiniyak naman ni Senador Ronald Dela Rosa, chairman ng komite, na mayroon na syang kopya ng presentasyon ni Gapay at ipamamahagi nya ito sa mga miyembro ng komite.
Sa panig ng National Bureau of Investigation (NBI) na nag-imbestiga sa pagpatay sa apat na sundalo, sinabi nila na sumentro lamang sa insidente ng pamamaril ng mga pulis sa apat na sundalo ang kanilang imbestigasyon.