Binigyang pugay ng Malakanyang ang lahat ng mga Filipino frontliners na siyang nangunguna sa pakikipaglaban sa coronavirus disease 2019 (COVID-19) pandemic.
Kasabay ito ng paggunita sa ika-159 na anibersaryo ng kapanganakan ng pambansang bayani ng Pilipinas na si Gat Jose Rizal ngayong araw.
Sa ipinalabas na pahayag ni Presidential Spokesperson Harry Roque, kanyang sinabi na ipinaaalala ng okasyon ito ang pag-aalay ni Rizal ng kanyang buhay at serbisyo na maihahalintulad sa kinahaharap na hamon ng kasalukuyan.
Makikita aniya ito sa mga matatapang na Filipino frontliners, ang mga makabagong bayani ng bansa na humaharap sa hamon at nagsisilbing tanglaw ng pag-asa sa mga mahihina at natatakot dahil sa pandemiya.
Kaugnay nito, hinimok ni Roque ang lahat partikular na ang mga kabataan na pag-asa ng bayan na gawing inspirasyon ang buhay ni Rizal at tularan ang kanyang mga prinsipyo para maging daan sa tunay na pagbabago sa bansa.