Nakahanda ang Philippine National Police (PNP) na sundin ang anumang kautusan kaugnay ng kinahaharap na kaso ni Communist Party of the Philippines (CPP) founding chairman Joma Sison.
Ayon kay PNP Spokesperson Police Brig. General Bernard Banac, sa kasalukuyan ay may standing warrant of arrest si Sison at kanila itong isisilbi sa kanya sakaling umuwi ito ng Pilipinas.
Gayunman, tiniyak ni Banac na susunod ang pulisya sakaling magkaroon ng pagbabago sa sitwasyon at ipatigil ang pag-aresto kay Sison sa gitna na rin ng planong pagbuhay ang usapang pangkapayapaan.
Una nang sinabi ni Presidential Spokesperson Salvador Panelo na hindi aarestuhin si Sison oras na pumayag itong ganapin ang peacetalks sa pagitan ng pamahalaan at komunistang grupo sa Pilipinas.
Sa ngayon merong standing warrant of arrest at hanggat hindi ito mababago ay mananatili ito, so, kapag siya man ay umuwi ay ihahain itong warrant of arrest sa kanya, subalit kung magkakaroon ng pagbabago dahil sa usapang pangkapayapaan ay tayo naman ay nakahandang sumunod,” ani Banac. —sa panayam ng Balitang Todong Lakas