Tukoy na ng pulisya ang pagkakakilanlan ng nasa likod ng pamamaril at pagpatay sa kolumnista ng Remate at kasama nito sa Arayat, Pampanga.
Ayon kay Presidential Task Force on Media Executive Director Undersecretary Joel Egco, kilala ng mga biktimang sina Jupiter Gonzales, kolumnista ng tabloid na Remate at kasamahang si Christopher Tiongson ang person of interest sa krimen.
Aniya, kanila nang pinahahanap ang nabanggit na person of interest sa PNP – CIDG para masampahan na rin ng kaso.
Dagdag ni Egco, isa sa tinututukang motibo sa pagpatay ang usapin sa ilalagay na peryahan sa Barangat Cacutid dahil sa nalalapit na pista sa lugar.
Samantala, nilinaw naman ni Egco na hindi tinambang ang mga biktima kundi pinasok sa loob ng kanilang sasakyan at saka pinagbabaril batay na rin aniya sa kuha ng CCTV sa lugar.
