Itinuturing ni Solicitor General Jose Calida na isang tagumpay ng Sambayanang Pilipino ang ginawang pagpapatibay ng Korte Suprema sa pagpapatalsik kay atty. Maria Lourdes Sereno bilang Chief Justice.
Ayon kay Calida, pinatunayan lamang aniya ng mga mahistrado na walang sinumang nakahihigit sa batas maging ito man ang pinakamataas na pinuno ng hudikatura.
Ipinagmalaki pa ni Calida ang matibay ang lahat ng mga inilatag niyang argumento na nagpapawalang bisa sa appointment ni Sereno sa naturang posisyon.
Samantala, nanindigan naman ang pinatalsik na punong mahistrado na tuloy pa rin ang laban sa mga aniya’y baluktot na sistema ng kasalukuyang administrasyon.
Sa kaniyang talumpati sa UP Bahay ng Alumni kahapon, sinabi ni Sereno na dapat papanagutin si Pangulong Rodrigo Duterte sa mga ginawa nitong kasalanan sa bayan lalo na sa mga kumukuwesyon sa kaniyang ipinatutupad na polisiya.