Inaasahan pa ring palalakasin ng bagyong Domeng ang hanging habagat na magdadala naman ng ulan sa kanlurang bahagi ng Luzon at Visayas simula bukas.
Sa huling monitoring ng Philippine Atmospheric Geophysical and Astronomical Services Administration o PAGASA, napanatili ng bagyong Domeng ang lakas nito habang patuloy na kumikilos pahilaga sa bilis na labing limang (15) kilometro kada oras.
Ayon sa PAGASA, huling namataan ang bagyong Domeng sa layong apatnaraan at animnapung (460) kilometro silangan ng Casiguran Aurora.
Taglay nito ang lakas ng hanging aabot sa limampu’t limang (55) kilometro kada oras malapit sa gitna at pagbugsong aabot sa animnapu’t limang (65) kilomtro kada oras.
Samantala patuloy namang makararanas ng katamtaman hanggang sa minsanang malalakas na pag-ulan ang Southern Luzon at Western Visayas bunsod ng pinagsamang epekto ng bagyong Domeng at monsoon trough.
Sa Linggo pa ng gabi o Lunes ng umaga inaasahang tuluyang lalabas ng Philippine Area of Responsibility o PAR ang bagyo.
—-
