Kinumpirma ng Department of Education o DepEd na may ilang estudyante na ang nag-positibo sa iligal na droga.
Kasunod ito ng ginagawang random drug testing noong School Year 2017 – 2018 na ipagpapatuloy ngayong 2018 hanggang sa susunod na taon kung saan target ng DepEd ang 20,000 na mga estudyante.
Ayon kay DepEd Spokesman Nepomuceno Malaluan, bagama’t may mangilan – ngilan na nagpositibo ay malayo naman ito sa alarming level.
Aniya, hindi ipapakulong o sisipain sa paaralan ang mga mag-aaral na nagpositibo bagkus ay sasailalim sa intervention, counselling at iba pa.
“This is not a law enforcement matter kaya ang aming ka-partner dito sa combat na ito ay hindi PNP, hindi local government kundi ang Department of Health.” Ani Malaluan
Samantala, siniguro ng DepEd na magiging pribado at may seguridad ang mga batang sasailalim sa random drug testing.
Ayon kay Malaluan, maging masinop ang paghahanda ng ahensya para sa naturang drug testing upang siguruhing mabibigyan proteksyon ang mga mag-aaral.
Dagdag pa ni Malaluan, hindi lalabas sa anomang paraan ang mga detalye at maging resulta ng isasagawang test.
“Talagang sininop namin, ang unang issue diyan ay privacy, confidentiality of records and results of this drug testing, sinisiguro namin ‘yan sa mga magulang at mag-aaral.” Pahayag ni Malaluan
(Balitang Todong Lakas Interview)
