Patay ang dalawang hinihinalang illegal drug personalities sa ikinasang buy bust operation ng pulisya sa bayan ng Lian sa Batangas.
Kinilala ang mga nasawing suspek na sina Paolo Villapando na kilala umanong tulak sa Balayan at Nelson Alab na dati nang naaresto dahil sa iligal na droga sa bayan naman ng Nasugbu.
Ayon kay CALABARZON Police Regional Office Director Chief Supt. Guillermo Eleazar, unang nagpaputok ng baril ang dalawang suspek habang nagsasagawa ng anti drug operations ang mga pulis sa Barangay Matabungkay.
Gumanti aniya ang mga pulis dahilan naman ng pagkakapatay sa dalawa.
Samantala, tinatayang aabot naman sa dalawang milyong pisong halaga ng hinihinalang shabu ang nasabat ng pulisya sa isang bahay sa Lipa City.
Ayon kay Eleazar, sinilbihan ng search warrant ang suspek na si Marcial Orbigoso sa kasong illegal possession of firearms pero nang halughugin ang bahay nito tumambad ang tinatayang nasa tatlong daang gramo ng shabu.
Nakuha rin sa trahanan ng suspek ag dalawang rolyo ng aluminum foil, bundle ng mga plastic sachet, kalibre kuwarenta’y singkong baril, magazine at mga bala.
