Pinaiimbestigahan na ni PNP Chief Dir/Gen. Oscar Albayalde ang mga pulis na bumabatikos sa kanya online o gamit ang social media sa internet.
Ito’y kasunod ng nabasang komento ni Albayalde sa Facebook page na “Buhay Lespu” na binabatikos ang ginagawa niyang pag-iinspeksyon sa lahat ng mga natutulog na pulis habang naka-duty.
Dahil dito, inatasan ni Albayalde ang DICTM o ang Directorate for Information and Communications ng PNP para tukuyin ang mga basher niyang pulis at ipatawag sa kaniyang tanggapan.
Bagama’t nilinaw ng PNP chief na hindi siya tutol sa freedom of expression, posible namang maharap sa kasong insubordination o pagsuway sa mga nakatataas na opisyal ang mga pulis na babatikos sa kaniya online.
Giit ni Albayalde, hindi tamang idaan sa social media ang anumang reklamo ng mga pulis laban sa kaniya lalo’t mayroon silang grievance committee na puwedeng lapitan ng mga pulis.