Patuloy na inaalam ng Department of Foreign Affairs (DFA) kung may mga Filipino ang nadamay sa nangyaring sunog sa isang mall sa Russia na ikinasawi naman ng mahigit animnapu (60) katao.
Ayon kay Philippine Ambassador to Moscow Carlos Sorreta, wala pa silang natatanggap na report na may nasawing Pinoy sa nasabing insidente.
Gayunman, pagtitiyak ni Sorreta, patuloy silang nakamonitor at nakikipag-ugnayan sa pamahalaan ng Russia para makakuha ng mga bagong impormasyon.
Kasabay nito, nagpaabot naman ng pakikiramay at dasal si Foreign Affairs Secretary Alan Peter Cayetano sa kaanak ng mga nasawing biktima ng itinuturing na pinakamapaminsalang sunog sa Russia.
Samantala patuloy pa rin ang ginagawang operasyon ng Russian authorities para mahanap ang nasa sampu (10) pang iba na nananatiling nawawala.
—-
