Idineklarang persona non grata ng Davao City Council si Senador Antonio Trillanes IV makaraang ihayag nito na ang Davao City ang may pinakamaraming kaso ng patayan at itinuturing na pinakamapanganib na lungsod sa buong bansa.
Ayon kay Davao City Vice Mayor Bernard Al-Ag na malaking insulto ang pahayag ni Trillanes gayung tumanggap ang lungsod ng Seal of Good Local Governance para sa mga taong 2011 at 2015.
Giit pa ni Al-Ag, hindi magtatagumpay si Trillanes sa paninira nito sa lungsod, sa mga Davawenyo lalong lalo na kay Pangulong Rodrigo Duterte na pinaka kilalang residente ng lungsod.
Pero nanindigan si Trillanes sa kaniyang binitiwang pahayag dahil ang ginamit niyang batayan ang datus mula sa estadistika ng PNP o Philippine National Police nuong Disyembre ng taong 2015.
Batid naman aniya ng mga Dabawenyo kung ano ang totoo subalit tila kinukonsinte lamang ito dahil na rin sa takot o di kaya’y posibleng pinaniniwalaan ng mga ito ang kasinungalingang isinusubo sa kanila ng Pamilya Duterte.
Ulat ni DWIZ Patrol Reporter Jopel Pelenio
Posted by: Robert Eugenio
