Walang Pilipinong sakay sa bumagsak na eroplano sa labas ng Moscow, Russia.
Ayon ito sa Filipino Volunteer Leaders Association sa Russia base na rin sa inilabas na advisory ng Philippine Embassy sa Moscow.
Sinabi ng Pinoy Organization sa Russia na walang Pilipinong sakay ng naturang eroplano sa initial examination sa passenger manifest bagamat umaasa ang embahada sa opisyal na kumpirmasyon mula mismo sa Russian government.
Kasabay nito, nagpaabot na ng pakikiramay ang embahada ng Pilipinas sa pamilya ng pitumpu’t isang (71) sakay nang nadisgrasyang eroplano.
Batay sa ulat bigla na lamang nawala sa radar ang nasabing eroplano ilang minuto makalipas itong lumipad.
Agad namang naglunsad ng search and rescue operation ang mga awtoridad matapos maulat ang pagkawala ng eroplano.
Patuloy naman ang imbestigasyon kaugnay sa dahilan ng pagbagsak ng commercial plane na pag-aari ng Saratov Airlines.
—-
