Iginiit ni Supreme Court Associate Justice Teresita Leonardo-de Castro na wala siyang ibinibigay na impormasyon, dokumento o ulat na may kaugnayan sa mga usaping panloob ng Korte Suprema.
Iyan ang inihayag ni De Castro makaraang makaladkad ang kaniyang pangalan gayundin ng Manila Times reporter na si Jomar Canlas sa deliberasyon ng Kamara hinggil impeachment laban kay Supreme Court Chief Justice Maria Lourdes Sereno.
Batay sa kalatas na inilabas ni De Castro sa pamamagitan ng Public Information Office ng Korte Suprema, sinabi ni De Castro na bagama’t kilala niya si Canlas bilang reporter, hindi naman ito nangangahulugang may mga inilalabas na siyang impormasyon dito lalo’t kung ito’y confidential o classified.
Una nang ipinatawag ng House Committee on Justice sina De Castro at Canlas sa susunod na pagdinig nito sa Lunes ng susunod na linggo upang magbigay linaw sa naturang usapin.
—-
