200 pulis mula sa Ilocos Norte ang lumarga na papuntang Maynila para magbigay seguridad sa 31st Association of Southeast Asian Nations o ASEAN Summit sa susunod na linggo.
Ang mga naturang puwersa ng Ilocos Norte police na sakay ng limang bus papuntang Metro Manila ay itinalaga sa crowd disposal management.
Libu – libong mga pulis ang nakatakdang italaga ng Philippine National Police o PNP para sa seguridad ng halos 2,000 delegado sa mga lugar ng pulong at iba pang pagtitipon kaugnay sa ASEAN Summit sa susunod na linggo.
Matatandaang sinabi ni PNP Chief Ronald ‘Bato’ Dela Rosa na simula ngayong Miyerkules, Nobyembre 8, 2017 ay naka-full alert status na ang Philippine National Police para sa ASEAN Summit, na tatagal hanggang Nobyembre 15.
