Tinawag na cover up ni Senador Antonio Trillanes ang rekomendasyon ng Senate Blue Ribbon Committee na isailalim lamang sa lifestyle check sina Davao City Vice Mayor Paolo Duterte at bayaw na si Atty. Mans Carpio.
Ayon kay Trillanes, ginawa ni Blue Ribbon Committee Chairman Richard Gordon ang rekomendasyon para lamang bigyang–lugod ang kanyang political master na patungkol kay Pangulong Rodrigo Duterte.
Giit ni Trillanes, kung seryoso si Gordon na malaman ang buong katotohanan sa nakalusot na 6.4 billion pesos shabu shipment sa bansa, ay hindi dapat nito agad na itinigil ang pagdinig ng senado.
At hindi din aniya dapat inabswelto agad si Vice Mayor Paolo Duterte sa anomalya hangga’t hindi pa natatagpuan si Nani Cabato Coronacion o alyas Tita Nani.
Samantala, lumagda na si Senate Majority Floor Leader Tito Sotto sa nasabing draft report at iginiit na kung makukulangan ang ilang mga senador sa nasabing report ay maari pang ayusin ito pagdating sa plenaryo.
