Posibleng mas marami pang mga bihag ang nanatiling hawak ngayon ng mga terorista sa Marawi City.
Ayon kay Colonel Romeo Brawner, deputy commander ng Joint Task Group Ranao, tinatayang nasa apatnapu (40) hanggang animnapu (60) pa ang natitirang bihag ng grupong Maute taliwas sa nauna nilang pahayag na nasa dalawampu (20) na lang ang mga ito.
Paliwanag ni Brawner, ito ay batay sa ibinigay na impormasyon sa kanila ng mga bihag na nakaligtas mula sa terorista noong nakaraang linggo.
Dagdag pa ni Brawner, posibleng itinatago ng mga terorista sa mga hindi pa nababawing Mosque at gusali ang iba pang bihag at binibigyan ito ng mga armas upang pwersahin na makipaglaban.
Nauna rito, sinabi ng militar na hindi na aabutin ng isang buwan ay posibleng matapos na ang mahigit apat na buwang bakbakan sa pagitan ng tropa ng pamahalaan at Maute – ISIS group sa Marawi City.
