Nakatakdang ilabas ngayong araw ang committee report ng Senate Blue Ribbon Committee kaugnay ng paglusot ng 6.4 bilyong pisong halaga ng shabu shipment na lumusot sa Bureau of Customs.
Ayon kay Senador Richard Gordon, kasama sa report ang tinaguriang ‘Davao Group’ ngunit titiyakin aniya na malilinis ang pangalan ni Davao City Vice Mayor Paolo Duterte na idinadawit ni Senador Antonio Trillanes.
Ani Gordon, mapapatunayan din sa report na walang napala si Trillanes sa pagdinig sa anak ng Pangulong Rodrigo Duterte at sa bayaw na si Atty. Mans Carpio.
Sinabi din ni Gordon na kahit pa may ilalabas ng report hinggil sa shabu shipment ay muling magsasagawa ng pagdinig ang senado na tututok naman sa korapsyon at ‘tara’ system sa Bureau of Customs.
