Nilinaw ng PNP o Philippine National Police na walang kautusang inilabas si PNP Chief Ronald ‘Bato’ Dela Rosa na nagbabawal sa media na makakuha ng spot report mula sa pulisya.
Ayon kay PNP Spokesman Chief Superintendent Dionardo Carlos, luma na o taong 2014 pa ang kanilang memorandum na nagbabawal sa paglalabas sa spot report lalo na kapag mayroong ‘on going’ investigation o mga babae at menor de edad ang sangkot sa krimen.
Gayunman, maaari naman aniyang makakuha ng kopya ng spot report ang media kung gagawa ng formal request.
Ipinaliwanag ni Carlos na sa halip na spot report, dapat press release ang inilalabas ng mga pulis.
Maaari rin namang direktang makipag-ugnayan ang media sa mga commander upang magtanong ng mga kailangan nitong detalye lalo’t wala naman silang itinatagong impormasyon at ang kanilang kautusan ay hindi paglabag sa Freedom of Information Law.
Una nang lumabas ang ulat sa Cebu na pinagbabawalan umano ang mga mamamahayag na makakuha ng spot report mula sa PNP.
Ulat ni Jonathan Andal
_____