Panahon na para maglabas ng ebidensya ang mga nagpaparatang sa pamilya ni Pangulong Rodirgo Duterte na sangkot sa anomalya sa BOC o Bureau of Customs.
Ito’y ayon kay Justice Secretary Vitaliano Aguirre kasunod ng paggigiit ni Senador Antonio Trillanes IV na ipatawag sa susunod na pagdinig ng blue ribbon committee sina Davao City Vice Mayor Paolo Duterte at asawa ni Mayor Inday Sara na si Atty. Mans Carpio.
Ayon sa kalihim, hatala naman aniya ang nais tumbukin ni Trillanes at iyon ay palabasing isang family affair ang nangyaring pagpupuslit ng shabu sa Aduana.
Kasunod nito, sinabi ni Aguirre na sapat na ang ginagawang pagdinig ng senado hinggil sa usapin at hindi na kailangan pang dumagdag o gumawa ng sariling pagsisiyasat dito ang kagawaran.
