Kumbinsido si Philippine National Police (PNP) Chief Director General Ronald Dela Rosa na walang nangyaring iregularidad sa ginawang operasyon ng pulisya sa Biñan, Laguna kamakailan.
Ito’y makaraang mapatay sa operasyon ang tatlong kidnapper kahit pa nahagip sa kuha ng CCTV ang tila pagsuko ng mga ito.
Ayon sa PNP Chief, mas nanaisin pa niyang mamatay ang mga kidnapper kaysa sa mga biktima o ang mga pulis ang siyang maiiwang nakabulagta.
Kasunod nito nanindigan si Dela Rosa sa testimoniya ng mga pulis na nagkasa ng operasyon bagama’t sinimulan na ng PNP Internal Affairs Service (IAS) ang kanilang imbestigasyon hinggil sa mga ito.
