Embahada ng PH sa South Korea nagtakda na ng mga exit points
Mahigpit na tinututukan ng embahada ng Pilipinas sa South Korea ang sitwasyon hinggil sa nangyaring tensyon sa Korean Peninsula.
Ayon kay Philippine Ambassador to SoKor Raul Hernandez, sa katunayan, naglatag na sila ng mga lugar kung saan isasakay ang mga Pilipino sakaling magkasa sila ng paglilikas.
Regular din aniyang nagpupulong ang mga opisyal ng embahada kasama ang Pinoy community leaders upang magbigay update hinggil sa ginawa nilang contingency measures.
Nagtakda na rin ang embahada ng exit points na siyang daraanan ng mga ililikas na mga Pilipino palabas ng SoKor sa sandaling kailanganin.
DFA wala pang balak magpalabas ng travel warning sa Guam
Pinaalalahanan ng DFA o Department of Foreign Affairs ang mga Pilipinong naninirahan, nagtatrabaho o nagbabakasyon sa guam na manatiling naka-alerto at mapagmatyag.
Ito ang inihayag ng DFA sa harap na rin ng bantang pag-atake ng North Korea sa Guam na teritoryo ng Amerika kasunod ng palitan ng mga maaanghang na salita nila US President Donald Trump at NoKor Leader Kim Jung-un.
Ayon kay DFA Spokesman Assistant Secretary Robespierre Bolivar, nananatili pa namang ligtas sa kasalukuyan ang pagbiyahe sa Guam sa kabila ng naturang banta.
Kasunod nito, sinabi ng opisyal na wala pang plano ang kagawaran na magpalabas ng travel advisory sa guam kahit pa anumang oras ay maaaring ikasa o isakatuparan ng NoKor ang kanilang banta.
