Arestado ang apat katao matapos mahulihan ng 500 gramo ng shabu sa isang police checkpoint sa Lanao del Sur.
Kinilala ni Senior Superintendent John Guyguyon, acting chief ng Lanao del Sur Provincial Police Office ang mga suspek na sina Alex Macasasa, Ansary Fahad Disoma, Fatima Billa at Abden Macasasa.
Nakuha rin sa mga suspek sa nasabing checkpoint sa bayan ng Lumbayangue ang P10,000.00 cash.
Inamin ng mga suspek na kinukuha nila ang droga sa isang contact nila sa probinsya.
Tini-trace na ng mga otoridad ang pangunahing pinagkukunan ng mga iligal na droga ng mga suspek.
Samantala, sinabi ni Guyguyon na tinangkang samantalahin ng mga suspek ang kaguluhan sa Marawi City.
Wala naman aniyang direktang kaugnayan ang mga suspek sa Maute group na sinasabing kumukuha ng pondo mula sa illegal drug trade.
