Hindi overloaded kundi overcrowding ang sanhi ng paglubog ng MB Kim Nirvana B sa Ormoc, Leyte na ikinasawi ng mahigit 60 pasahero.
Ito ang inihayag ni Marina Administrator Maximo Mejia sa pagdinig kahapon ng House Committee on Transportation and Communication ukol sa insidente.
Ayon kay Mejia, overcrowded ng 20 pasahero ang lumubog na motor banca.
Idinagdag pa ni Mejia na kulang ng tauhan ang Philippine Coast Guard (PCG) at ang Marina para aprubahan ang lahat ng paglalayag ng mga bangka, pero obligado ang mga may-ari ng bangka na tiyakin ang seguridad ng paglalayag nito sa lahat ng oras.
Nabunyag din na hindi lisensyado o hindi nagtapos sa isang nautical school ang kapitan ng tumaob na MB Kim Nirvana sa Ormoc City kamakailan.
Sa isinagawang pagdinig ng House Committee on Transportation and Communication, sinabi ni Leyte 3rd District Rep. Andres Salvacion, desk officer lamang ang nagmando sa tumaob na motor banca na isa aniyang illegal practice.
Kaya’t sinabi ng mambabatas na kailangang mapanagot sa nasabing insidente ang may-ari ng nasabing bangka.
No show naman sa pagdinig si Transportation Secretary Joseph Emilio Abaya ngunit hindi naman binanggit kung ano ang dahilan kung bakit ito hindi nakadalo.
Ayuda
Samantala, inamin ni Maritime Industry Authority (Marina) Administrator Maximo Mejia Jr. na hindi lahat ng pasaherong namatay sa lumubog na MB Kim Nirvana B ay makakatanggap ng P200,000 insurance dahil wala sa manipesto ang iba sa mga ito.
Ayon kay Mejia, ang manipestong may mga pangalan ng mga pasahero ay isinumite ng MB Kim Nirvana B sa Philippine Coast Guard.
Sinabi rin ni Mejia sa ginawang pagdinig ng House Committee on Transportation, na “misloading” at hindi overloading ang naging dahilan nang paglubog ng bangka.
Ayon kay Mejia, otorisadong magkarga ang MB Kim Nirvana ng 194 pasahero at umabot lamang ang bigat nito sa 50 tonelada samantala ang kapasidad ng bangka ay 100 tonelada.
Sinisi ni Mejia ang kapitan at mga tripulante nito dahil sa hindi tamang pagkarga ng mga sako ng bigas at semento.
By Meann Tanbio | Mariboy Ysibido | Jaymark Dagala
