Makapagpapababa sa dignidad ni Pangulong Rodrigo Duterte ang mungkahi na gawin siyang special prosecutor sa impeachment complaint laban kay Chief Justice Maria Lourdes Sereno.
Ito ang inihayag ni Senator Chiz Escudero makaraang igiit na hindi makabubuti para sa Pangulo kapag tumayo itong special prosecutor sa impeachment ng punong mahistrado.
Ayon kay Escudero, mas maraming mahalagang tungkulin na dapat asikasuhin ang punong ehekutibo.
Maging si Senate President Koko Pimentel ay hindi komporme sa panukala ni Atty. Larry Gadon na posibleng gusto lang sumipsip o magpapansin dahil plano nitong tumakbo sa 2019 Senatorial elections.
Nagkaisa sina Pimentel at Escudero na mas dapat tumutok ang atensyon ng Pangulo sa napakaraming problema na kinaharap ng bansa.
