Kinatigan ng palasyo ng Malakanyang ang naging decision ng PCOO o Presidential Communications Operations Office na magpadala ng mga opisyal sa Europa para sa isang press freedom caravan.
Ayon kay Presidential Spokesperson Salvador Panelo, sang-ayon siya sa opinyon ni PCOO Martin Andanar na naging makabuluhan at matagumpay ang naturang caravan.
Paliwanag pa ni Panelo, layon ng caravan na maghatid ng mga mahahalagang impormasyon at kampanya ng gobyerno sa mga Pilipinong nasa abroad at mga miyembro ng international community.
Wala rin anya itong kinalaman sa pag-aresto kay Rappler Chief Executive Officer Maria Ressa dahil nagtungo anya sa Europa ang mga opisyal dalawang araw bago nangyari ang pag-aresto kay Ressa.
Gayunman, inatasan din ng palasyo ang mga opisyal na sagutin kung mayroon mang mga katanungang may kaugnayan kay Ressa.
