Idineklara na ng panel na submitted for resolution na ang kaso nina Police Officers 1 Jeffrey Perez at Ricky Arquilita, ang dalawang Pulis-Caloocan na sangkot umano sa pagpatay kay Carl Angelo Arnaiz.
Ito’y matapos na personal na mapanumpaan ng mag-asawang Solomon at Madeline Rosca ang kanilang affidavit sa harap ni Senior Associate State Prosecutor Emilia Vctorio bilang mga testigo nina Perez at Arquilita.
Nangangahulugan ito na dedesisyunan na ng panel ang reklamo laban sa dalawang pulis na kasama ring humarap sa panel kahapon.
Matatandaang nakasaad sa sulat-kamay na affidavit ng mag-asawang Rosca na namamasada umano sila ng tricycle madaling araw noong August 18 kung kailan napatay si Carl Angelo sa C3 -road.
Ikinuwento ng mag-asawa na mayroong isang lalaking nakasuot ng itim na jacket at hinahabol nang dalawang sumisigaw na pulis.
Gayunman, bumunot anila ng baril ang lalaking naka-itim na jacket at pinutukan ang dalawang nagpakilalang pulis at doon na nagkaroon ng palitan ng putok ang magkabilang panig na ikinamatay ni Arnaiz.
