Isinailalim sa hard lockdown ang Barangay 23-C sa Davao City simula noong Sabado, Hulyo 4.
Ito ay bunsod ng naitalang mataas na bilang ng kaso ng coronavirus disease 2019 (COVID-19) sa nabanggit na barangay sa Davao City.
Ayon kay Davao City Mayor Sara Duterte Carpio, mahigpit na ipatutupad ang lockdown sa loob ng hindi bababa sa 14 na araw.
Sinabi ni Duterte-Carpio, itinuturing na “very high risk” ang Barangay 23-C batay na rin sa isinagawa nilang risk assessment kung saan nakapagtala ng kabuuang 88 kaso ng COVID-19 doon.
Dahil dito, walang pinapayagang makalabas o makapasok sa barangay maging ang mga fronliners, pulis, sundalo at mga medical workers.
Samantala, namahagi naman ang pamahalaang lungsod ng Davao ng mga food packs sa mga residente ng Barangay 23-C bago nagsimula ang lockdown.
