Hindi patitinag ang House Committee on Justice sa pagsusulong ng impeachment laban kay Commission on Elections o COMELEC Chairman Andres Bautista.
Ito’y kahit pa isinapubliko na ni Bautista ang liham mula sa Malacañang na nagsasaad ng pagtanggap mismo ni Pangulong Rodrigo Duterte ng kaniyang pagbibitiw na epektibo sa lalong madaling panahon.
Ayon kay House Committee on Justice Chairman at Mindoro Rep. Reynaldo Umali, wala pa silang opisyal na komunikasyong natatanggap mula sa Palasyo kaya’t mabuti munang hintaying makarating ito sa kanila.
Una nang nilinaw ni Umali na hindi politically motivated ang impeachment kay Bautista gayundin sa parehong reklamo laban kay Supreme Court Chief Justice Maria Lourdes Sereno.
Gayunman, sinabi ni Umali na iba ang kaso ni Ombudsman Conchita Carpio Morales kung saan, tila nagpapalapad lamang ng papel kay Pangulong Rodrigo Duterte ang mga naghain ng reklamo laban dito.
—-
