Patay matapos pagbabarilin ang isang dating miyembro ng Presidential Security Group o PSG habang pauwi sa kaniyang bahay sa bayan ng Magpet sa North Cotabato.
Kinilala ni Chief Inspector Rommel Constantino, Hepe ng Magpet Municipal Police Station ang biktima na si Ronel Galupo, 42-taong gulang at dating PSG member ng Duterte administration.
Tama ng bala ng baril sa ulo at dibdib ang tinamo ni Galupo mula sa mga suspek na umatake sa kaniya.
Sinabi ni Constantino na kaagad tumakas ang mga suspek patungo sa Barangay Binay na aniya’y kadalasang exit route ng mga kriminal sa nasabing bayan.
Tinututukan ng mga awtoridad ang personal na dahilan sa posibleng motibo sa nasabing krimen.
—-
