Sisimulan na ngayong araw ng Con-Com o Consultative Committee na binuo ni Pangulong Rodrigo Duterte ang pagrepaso sa 1987 Constitution.
Ayon kay dating Senate President Aquilino “Nene” Pimentel Jr. isa sa miyembro ng Con-Com, umpisa ngayong Lunes Pebrero 19, araw-araw at maghapon na silang magpupulong hinggil sa mga probisyon ng konstitusyon na maaaring baguhin para sa isinusulong ng Malacañang na federalism.
Sinabi ni Pimentel na bukas sa publiko ang nasabing pagdinig kung saan maaari rin magkaroon ng live streaming upang mas marami ang makapanood.
Tiniyak din ni Pimentel na wala silang monopolya ng ideya kaya mayroong mga inimbitahang eksperto para konsultahin ukol sa konstitusyon.
Kasabay nito nanawagan ang opisyal sa mga mambabatas na hintayin ang magiging rekomendasyon ng Con-Com bago gumawa ng sarili nilang panukala sa pag-amyenda sa konstitusyon upang magkaroon ng iisang direksyon at hindi magbunga ng pagkaka-watak-watak
Ipinabatid ni Pimentel na target ng Con-Com na makabuo ng rekomendasyon bago ang State of the Nation Address ng Pangulo sa Hulyo, taong kasalukuyan.
—-
