Patay sa pamamaril ang isang patroller ng South Luzon Expressway (SLEX) sa Calamba City.
Ayon sa ulat, papasok sana sa trabaho ang biktimang si El Marcelo Danoso nang bigla siyang barilin sa noong hindi pa nakikilalang mga suspek kaninang umaga.
Nagpapatuloy ang imbestigasyon ng mga otoridad sa naturang insidente.
Uubrang madaanan ng mga motorista ang mga tulay at kalsada sa Region 12.
Tiniyak ito ng Department of Public Works and Highways (DPWH) Region 12 matapos yumanig ang magnitude 6.9 na lindol sa Matanao, Davao Del Sur, pasado alas -2 ng hapon, kahapon, ika-15 ng Disyembre.
Sinabi ng DPWH Region 12 na ligtas daanan ang mga tulay sa SOCCSKSARGEN.
Patuloy pa rin naman anila ang isinasagawa nilang inspeksyon at pagtutok sa mga imprastruktura sa mga lugar na apektado ng lindol.
Mahigpit na tinututukan ng Deparmtent of Health (DOH) ang sitwasyon sa mga ospital na apektado ng magnitude 6.9 na lindol sa tumama sa Davao Del Sur at naramdaman sa iba’t ibang panig ng Mindanao, kahapon, ika-15 ng Disyembre.
Sinabi ni Health Undersecretary Myrna Cabotaje na nagpapatuloy ang assessment at validation ng DOH kasabay ang pagkukumpleto sa listahan ng mga ospital at iba pang pasilidad na napinsala ng lindol.
Subalit ipinabatid ni Cabotaje na nagkaroon ng minor damages sa Malungon Rural Health Unit sa Saranggani –batay sa kanilang nakuhang report.
May napaulat ding mga pasyente na inilabas mula sa Davao Del Sur Provincial Hospital at nananatili muna sa ilang tents ang mga pasyente.
Ayon pa kay Cabotaje, isa rin sa priority ng DOH ang mga pasyente lalo na ang mga buntis o mga ina na nanganak at kanilang mga sanggol, mga nakatatanda at may mga mabibigat na sakit.
Tiniyak din ni Cabotaje na handa ang DOH na tumulong sa mga nabiktima ng lindol.
Pinaghahanap pa rin ang anim kataong pinangangambahang natabunan sa gumuhong grocery store sa bayan ng Padada kasunod ng pagtama ng 6.9 na lindol sa Davao Del Sur.
Una nang nakumpirma ang apat na nasawi sa naturang pagyanig.
Ayon sa Bureau Of Fire Protection Special Unit, nakapagtext pa ang babaeng kahera na anim pa silang natabunan sa naturang establisyimento.
Gumagamit na ng life detector equipment ang mga otoridad para mabilis na mahanap ang mga biktima.
Bago ito, may nauna nang dalawang bangkay ang na retrieve sa naturang grocery store kaninang umaga.
Malubha ang naging pinsala sa bayan ng Hagonoy, Davao Del Sur sa pagtama ng 6.9 na lindol sa Mindanao.
Ayon kay Hagonoy Mayor Franco Calida, mahigit 40 mga establisyemento at kabayahan ang totally damaged.
Habang mahigit 500 pamilya naman ang inilikas mula sa mga barangay na malapit sa dagat.
Tumuloy ang mga ito sa malaking simbahan dahil nasira din ng lindol ang gym at mga paaralan na nagsisilbing evacuation centers.
Hirap din sa isinasagawang clearing operations sa mga kalsada dahil sa patuloy na aftershock na nararamdaman sa lugar.
Kaugnay nito, umapela ang alkalde ng mabilisang ayuda mula sa gobyerno.
Sana ay madalian ang pagpapadala ng kahit anong bagay para maibigay natin sa ating mga evacuate, syempre hindi sila nakakabalik sa kanilang bahay, dahil sa totally damaged, e, sana po ang national government ay mabigyan ng prayoridad dito sa epicenter —ang Padada, Hagonoy,” ani Calida. — sa panayam ng Ratsada Balita
Nagpasaklolo na ang Baguio City sa national government para maresolba ang problema sa kalikasan partikular sa sewerage system.
Ayon kay Baguio City Mayor Benjamin Magalong, sa Enero ay nakatakdang magtungo sa syudad ag Department of Environment and Natural Resources (DENR), Department of Tourism (DOT) at Department of the Interior and Local Government (DILG) upang mag-inspeksiyon at magbigay ng rekomendasyon.
Sa ngayon aniya ay nag-iisa lamang ang kanilang sewerage treatment plant kaya marami pa rin sa ginamit na tubig ay natatapos nang hindi nalilinis.
So, ang tinitignan namin dito, head water, so, nacocontaminate namin, ‘yung mga downstream,” ani Magalong. — sa panayam ng Balitang Todong Lakas
Gumagamit na ng special equipment ang rescuers mula sa Davao Central 911 para ma-detect kung mayroon pang buhay sa gumuhong commercial center sa Padada, Davao Del Sur matapos ang magnitude 6.9 na lindol kahapon.
Ayon sa Municipal Disaster Risk Reduction And Management Office (MDRRMO), anim ang nasugatan at lima ang hinihinalang nawawala pa sa gumuhong Southern Trade Shopping Center –base na rin sa impormasyon ng mga kaanak ng mga ito.
Inamin ng mga otoridad na hirap silang magsagawa ng search and retrieval operations sa lugar dahil sa mga aftershocks at manaka-nakang pagbuhos ng ulan.
Focus ng retrieval operations ay ang exit area malapit sa payment counters dahil dito nagtakbuhan ang mga tao matapos ang unang pagyanig.
Samantala, isang water reservoir at isa pang commercial establishment ang gumuho sa padada.
Apat ang sugatan sa pagguho ng water reservoir.
Isasailalim sa state of calamity ang bayan ng Padada sa Davao Del Sur.
Ito ay dahil sa matinding pinsalang idinulot ng malakas na lindol.
Ayon kay Engr. Luke Caduyas, pinuno ng municipal disaster risk reduction and management office, nakatakdang magconvene ang lokal na pamahalaan ngayong araw para pormal na isailalim sa state of calamity ang Padada.
Aniya, halos buong Padada ang nagtamo ng pinsala dulot ng malakas na pagyanig.
Umabot na sa 350 ang aftershocks na naitala kasunod ng pagyanig ng malakas na lindol sa Mindanao.
Batay sa datos ng PHIVOLCS, magnitude 5.2 na lindol ang naitalang pinakamalakas na aftershock sa Matanao, Davao Sel Sur.
Naitala naman ang magnitude 4.5 na aftershock sa bayan ng Padada.
Kasabay nito, nilinaw ng PHIVOLCS na walang banta ng tsunami kasunod ng malakas na lindol.
Patay ang apat na hinihinalang miyembro ng New People’s Army (NPA) sa engkwentro sa tropa ng militar sa Matnog, Sorsogon.
Ayon kay Major Ricky Aguila, tagapagsalita ng 9th infantry division ng Philippine Army, nakatanggap ang kanilang hanay ng impormasyon na may rebelde umano sa lugar.
Dahil dito, agad namang nagsagawa ng operasyon ang 31st infantry battalion, 91st division reconnaisance company at 1st at 2nd mobile force company.
Tumagal ng isang oras ang bakbakan sa pagitan ng militar at rebelde na tinatayang nasa 60.
Narekober naman ang ilang mga armas at pampasabog sa pinangyarihan ng engkwentro.