Judith Estrada-Larino

 Tuluy-tuloy ang pagdinig ng Senate Blue Ribbon Subcommittee hinggil sa war on drugs ng nakalipas na administrasyon.

Sa katunayan, ipinabatid ni Subcommmittee Chair Senate Minority Leader Koko Pimentel na magpapatawag siya ng mga pagdinig pa ngayong buwan para matututukan ng husto ang nasabing usapin.

Sinabi ni Senador Pimentel na naamiyendahan na ang rules ng Senado kaya’t dadalhin na ng subcommittee ang prerogative ng mother committee na magpa-cite in contempt.

Tiniyak ni Senador Pimentel na mahigpit na bubusisiin ang usapin ng war on drugs partikular ang sinasabing cash reward sa hanay ng pnp para sa mga mapapatay na drug suspect.

Nailipat na sa Jakarta, Indonesia si Mary Jane Veloso para masimulan na ang pag proseso nang pagpapabalik nito sa bansa.

Ipinabatid ito ni Celia Veloso, ina ni Mary Jane matapos dalhin sa isang pasilidad sa Jakarta ang Pinay mula sa Yogjakarta na siya rin aniyang dahilan kaya’t nakansela ang biyahe nilang pamilya pa Indonesia para saana bisitahin ang anak.

Sinabi ni ginang Veloso na hihintayin na lamang nila dito sa Pilipinas ang kanyang anak.

Natutuwa at excited aniya ang buong pamilya sa pag uwi ni Mary Jane na halos 14 na taong nakulong sa Indonesia.

Lilipad sana pa Indonesia kahapon ang pamilya Veloso, kanilang abogado at ilang opisyal ng gobyerno para bisitahin ang Pinay bago ang kanyang pag-uwi ng Pilipinas.

Naging killing field ng drug suspects at mga inosenteng sibilyan ang Pilipinas sa loob ng anim na taon o sa Duterte administration.

Ito ang tila ipinamukha ni Congressman Bienvenido Abante, miyembro ng Quad Committee sa dating pangulong rodrigo duterte sa pagharap nito sa unahang pagkakataon sa pagdinig hinggil sa war on drugs ng kanyang administrasyon.

Ayon kay Congressman Abante, Chairman ng House Committee on Human Rights, tinalo pa ng bansa ang Mexico at Colombia kung saan walang 10,000 ang nasawi sa kampanya ng mga nasabing bansa kontra iligal na droga gayung sa Pilipinas ay nasa mahigit 30,000 ang nasawi kung saan 7,000 lamang dito ang drug suspects.

Sinuportahan aniya nila ang war on drugs ng dating pangulo bagama’t nadismaya kalaunan dahil libu-libong Pilipino ang nasawi sa operasyon bukod pa sa pangako nitong tatapusin ang problema sa iligal na droga sa loob lamang ng anim na buwan na inabot ng anim na taon.

Ipinaalala rin ni Congressman Abante, isang Baptist Pastor na ibinoto niya at buong baptist church ang dating pangulong Duterte nuong 2016 presidential election.

Kukuwestiyunin ni Sen. Bato Dela Rosa si Senate President Francis “Chiz” Escudero sakaling pumayag itong makakuha  ng official transcript ng pagdinig tungkol sa war on drugs ni dating pangulong Rodrigo Duterte ang International Criminal Court.

Giit ng senador, hindi kinikilala ng Pilipinas ang hurisdiksyon ng ICC, kaya’t hindi dapat itong pahintulutan na makakuha ng kopya ng transcript.

Una nang sinabi ni Senate President Escudero na hindi magdadalawang-isip ang senado na ibigay ang transcript ng pagdinig ng Senate Blue Ribbon Subcommittee sa ICC o sinumang magre-request nito, basta’t may dahilan.

 No show muli ang mga dating opisyal ng Department of Education at Office of the Vice President sa pagdinig ng kamara.

Kasunod na rin ito nang idinaos na ika apat na pagdinig ng House Committee on Good Government and Public Accountability hinggil sa kuwestyunableng  paggamit ng pondo ng OVP at ng DEPED nuong si VP Sara pa ang DEPED Secretary.

Sa halip, iginiit ng mga naturang opisyal sa isinumiteng position paper na karapatan nilang huwag dumalo sa imbestigasyon dahil mayruon nang nakabinbing kaso sa korte hinggil sa isyu.

Bukod dito, sinabi ng mga opisyal na wala silang natanggap na subpoena at  hindi rin isinama sa imbitasyon ang draft bill para sa impormasyon ng resource person dahil malaki na anila ang ipinagbago ng subject matter ng pagdinig at hindi na nauugnay sa original issue.

Dahil dito, isinulong ni Congressman Joseph Stephen Paduano ang pagpapalabas ng Subpoena Ad Testificandum laban sa mga nasabing opisyal.

At kapag nabigo pa rin ang mga nasabing opisyal na dumalo  sa susunod na pagdinig ay ipapa-contempt na at ipapaaresto rin ang mga ito.

Una nang hiniling ni Committee Chairman Joel Chua sa Department of Justice na msglabas ng lookout bulletin order sa mga nabanggit na opisyal ng OVP.

Nanghihinayang ang House Quad Committee sa ginastos ng senado na pera ng taxpayers sa pagharap sa senate hearing ng dating pangulong Duterte.

Ayon sa Quad Comm, sa halip na humarap sa kanilang pagdinig, sa senado aniya humarap ang dating pangulo dahil naruon ang kanyang mga kaalyado tulad nina Senador Bong Go at Ronald Bato Dela Rosa.

Iginiit din ng komite na ang naturang senate hearing ay idinisenyo bilang platform para sa dating pangulo para maidepensa ang kanyang anti-drug policies.

Naniniwala rin ang Quad Comm na layon ng hiwalay na imbestigasyon ng senado na tabunan ang patuloy na pagdinig ng apat na komite ng kamara.

Una nang inihayag ng quad comm na ang pagharap ni Duterte sa senado ay hindi para sa katotohanan at transparency kundi ito ay isang panlilinlang sa publiko.

Nananatiling tikom ang bibig ni Vice President Sara Duterte sa hinihinging paliwanag ng kamara hinggil sa paggastos nito sa confidential fund ng Department of Education nuong sya pa ang kalihim nito.

Ito ayon kay House Senior Deputy Speaker Aurelio Gonzales, jr. ay kaya’t napipintong irekomenda ng House Committee on Good Government and Public Accountability ang paghahain ng kasong plunder o pandarambong  laban sa pangalawang pangulo.

Kasunod na rin ito nang pagtukoy ni Deputy Speaker Gonzales sa 112.5 million peso confidential fund ng DepEd sa ilalim ng pamumuno ni VP Sara.

Lumabas aniya sa pagdinig ng kamara na ang nasabing pondo ay na withdraw sa magkakahiwalay na tseke na nasa 37.5 million pesos bawat isa at inisyu sa special disbursing officer ng DepEd na si Edward Fajardo.

Muling kinuwestyon ni Deputy Speaker Gonzales ang aniya’y kawalan ng documentation sa mga nasabing mahahalagang transaksyon na higit pang nagpatibay sa kaduda dudang paggastos sa pondo.