Huhugasan ng paa ni Luis Antonio Cardinal Tagle bukas, Huwebes Santo ang mga magulang ng nasawing OFW na si Joanna Demafelis at binihag ng Maute terror group na si Father Chito Suganob.
Bukod kina Demafelis at Suganob, kabilang din ang mga migrante at refugees sa nakatakdang hugasan ng paa ni Cardinal Tagle ngayong taon sa Cathedral Basilica of the Immaculate Conception sa Maynila.
Ang ‘Washing of the Feet’ ay isang seremonya na isinasagawa taun-taon tuwing Huwebes Santo bilang pag-alala sa kababaang loob at paglilingkod ng Panginoong Hesukristo na naghugas din ng mga paa ng kaniyang mga alagad.
Noong nakalipas na taon ay hinugasan ng paa ni Cardinal Tagle ang mga dating gumagamit ng iligal na droga at mga miyembro ng pulisya bilang tanda ng kapayapaan sa kasagsagan ng libu-libong pagkamatay na iniuugnay sa giyera ng gobyerno sa bawal na gamot.
