Nagkasagupa ang mga tropa ng Pamahalaan at mga miyembro ng New People’s Army (NPA) sa magubat na bahagi ng Sitio Panaghiusa, Brgy. Katipunan, Abuyog, Leyte.
Ayon kay Lt Col Ernesto del Rosa, Commander ng 14th Infantry Battalion ng Philippine Army, nangyari ang engkwentro dakong 9:45 ng gabi.
Rumesponde aniya ang tropa ng mga sundalo sa tip ng ilang residente hinggil sa presensya ng mga rebelde sa lugar.
Nabatid na tangkang harangin ng mga rebelde ang paghahatid ng tulong para sa mga sinalanta ng bagyong Odette sa nabanggit na barangay pero agad itong napigilan.
Tiniyak naman ni Army’s 8th Infantry Division Commander M/Gen. Edgardo de Leon na kanila nang tinutugis ang mga nagsitakas na rebelde matapos ang engkwentro kung saan, 1 armas ang naiwan ng mga kalaban. —sa ulat ni Jaymark Dagala (Patrol 9)
