Pag-amin ng kasalanan.
Ito ayon kay Senador Risa Hontiveros ay pinatunayan ng pag-amin ni Solicitor General Jose Calida na hindi pa siya nagda-divest sa kaniyang business interest sa security company ng kaniyang pamilya.
Sinabi ni Hontiveros na sa bibig mismo nahuhuli ang isda at ang pag amin ni Calida ay katumbas nang pag amin sa alegasyon ng tiwaling gawain at conflict of interest.
Dahil dito case closed na o game over na aniya ang nasabing usapin.
Paliwanag ni Hontiveros na sa ilalim ng Republic Act 6713 o Code of Conduct and Ethical Standards for Public Officials and Employees, malinaw na nakasaad ang conflict of interest ng isang public official kung miyembro ito ng board o stockholder ng isang private corporation o kaya ay mayruong substantial interest sa isang negosyo.
Sa ilalim naman ng Anti Graft and Corrupt Practices Act, nakasaad na bawal gamitin ang isang kaanak na opisyal para magsamantala o gamitin ang impluwensya para makakuha ng kontrata sa gobyerno.
Kaugnay nito, muling nanawagan si Hontiveros sa Pangulong Rodrigo Duterte na sibakin at kasuhan si Calida.
