Nauunawaan ni Senador Panfilo Lacson ang pinagdaraanan ngayon ni retired SPO3 Arthur Lascañas gayundin ang dahilan ng paglabas nito sa bansa kasama ang kaniyang pamilya.
Ito ang reaksyon ni Lacson makaraang sabihin ni Lascañas na dapat mas naiintindihan siya ng Senador lalo’t minsan na rin itong nangailangan ng tulong nuong siya’y nagtatago pa.
Ayon sa Senador, may karapatan ang sinumang nakararanas ng pag-uugsig, paghihirap at panggigipit para pangalagaan ang seguridad ng kaniyang pamilya gayundin ng sarili.
Paliwanag ni Lacson, kaya lamang niya inuusisa kung sino ang nagpondo sa biyahe ni Lascañas patungong Singapore ay dahil sa may kaakibat na destabilization effort ang kaniyang pagtestigo sa Senado laban kay Pangulong Rodrigo Duterte.
Giit pa ni Lacson, hanggang ngayon aniya ay wala pa ring umaamin sa kung sino o sinu-sino ang mga tao na nasa likod ni Lascañas na posibleng kalaban ng Pangulo.
By: Jaymark Dagala / Cely Bueno
