Tumaas na ang presyo ng ilang brand ng mga processed meat products, dalawang araw bago magsimula ang ‘ber’ months.
P1.00 hanggang P2.00 ang itinaas ng ilang brand ng processed meat products tulad ng tocino, longganisa, bacon at ham.
Ayon sa Philippine Association of Meat Processors Inc. (Pampi), ito ay bunsod ng pagtaas din ng presyo ng baboy sa international market kung saan kumukuha ng raw meat materials ang mga local manufacturers.
Anila, tumaas kasi ang demand ng baboy sa international market matapos na tamaan ng African Swine Fever ang ilang bansa.
Gayunman, tiniyak ng Pampi na hindi nila ipapasa sa mga mamimili ang kabuuang taas-presyo para maiwasan ding humina ang kanilang benta.
Samantala, ilang brand naman ng delatang corned beef at meat loaf ang humihirit rin ng nasa P0.50 na price increase sa Department of Trade and Industry (DTI).
