Ikinakasa na ng Criminal Investigation and Detection Group o CIDG ang mga isasampa nilang kaso laban sa iba pang mga sangkot sa pagkawala ng mga sabungero.
Ayon kay CIDG Director, P/MGen. Eliseo Cruz, kabilang sa mga isasampa nilang kasong Kidnapping at Serious Illegal Detention laban sa 5 mula sa 10 armadong salarin na dumukot sa isang Ricardo Lasco sa San Pablo City sa Laguna.
Gayundin aniya sa mga nasa likod ng pagkawala ng mga sabungero sa Meycauayan, Bulacan na ikatlo sa mga kasong kanilang tinututukan.
Samantala, sinabi naman ni PNP Chief, P/Gen. Dionardo Carlos na titingnan din nila kung may kinalaman sa e-sabong ang pagkawala ng Paring si Fr. Leoben Octavo Peregrino.
Batay kasi sa backtracking na ginawa ng Rosario Municipal Police Station sa mga kuha ng CCTV kung saan nakita ang Pari, makailang beses itong nakitang huminto sa mga sabungan subalit hindi malinaw kung ano ang pakay nito roon.
Magugunitang nakagapos at nanghihina ang Pari nang matagpuan ito sa Silang, Cavite noong Linggo matapos na mapaulat na nawawala noong Sabado mula nang umalis ito sa kaniyang Parokya sa Rosario noong Biyernes.