Ikinakasa ng pambansang pulisya ang muling pagbaba nila sa mga pamayanan o komunidad upang muling ilapit sa taumbayan ang mga pulis.
Iyan ang tugon ng PNP o Philippine National Police kasunod ng SWS survey na nagsasabing mayorya ng mga Pilipino ang naniniwalang sangkot ang mga pulis sa kalakalan ng iligal na droga, tanim ebidensya at extra judicial killings.
Ayon kay PNP Spokesman Police Col. Bernard Banac, nakalulungkot aniyang isipin na sa kabila ng maigting na kampaniya na linisin ang kanilang hanay, marami pa rin ang nagdududa sa kanilang imahe.
Bagama’t nirerespeto ng PNP ang opinyon ng publiko hinggil dito, magpapatuloy naman ayon kay Banac ang kanilang ginagawang mga hakbang upang malinis at mapaganda ang imahe ng mga pulis.
Ang PCRG o Police Community Relations Group aniya ang siyang mangunguna para sa isasagawang image building sa hanay ng pambansang pulisya.
