Hinihintay na ng liderato ng Philippine National Police o PNP ang paliwanag ng apat na senior police official na namataang nakikipagpulong sa isang staff ni Liberal Party Standard Bearer Mar Roxas.
Sa panayam ng DWIZ, sinabi ni Police Chief Supt. Wilben Mayor, tagapagsalita ng PNP, na inaasahan nilang maghahain ng kani-kanilang memorandum sina Director Generoso Cerbo Jr., Chief Supt. Renier Idio, Chief Supt. Bernardo Diaz, at Chief Supt. Ronald Santos.
Ayon kay Mayor, ngayong araw ang itinakda nilang deadline sa mga naturang heneral para makapagsumite ng paliwanag sa nabanggit na usapin.
“Hindi pa natin natatanggap yung kanilang opisyal na paliwanag siguro baka mamaya po yun kasi meron naman silang deadline, at any rate hihintayin natin ito unless of course meron pang matibay na ebidensya then doon tayo magsisimula sa sanction na ibibigay sa kanila.” Pahayag ni Mayor.
By Jelbert Perdez | Ratsada Balita
