Pinag-aaralan na ng Philippine Insurance Corporation (PhilHealth) ang posibilidad na maisama sa kanilang COVID-19 benefit package ang saliva test.
Ayon kay PhilHealth President Dante Gierran, kanilang tatalakayin ang naturang usapin sa isasagawang pulong ng mga board of directors sa Enero 27.
Ani gierran, positibo silang maaaprubahan ang benefit package para sa COVID-19 saliva testing dahil mas mabilis, mas madali at komportable ito kumpara sa swab testing.
Samantala, sinabi ni gierran na sakop din ng kanilang pag-aaral at tatalakayin sa pagpupulong ang irerekomendang presyo ng saliva testing na sasagutin ng PhilHealth.
Una nang sinabi ng Philippine Red Cross na hindi pa nila maaaring i-charge sa PhilHealth ang bayad para sa saliva tests dahil wala pang ipinalalabas na benefit package ang ahensiya para rito.