Hindi pa matiyak ng Department of Education (DepEd) kung kailan muling magbabalik eskwela ang halos 2-M mga estudyante sa tatlong (3) rehiyon sa Mindanao.
Ito ay matapos na maapektuhan ng pagtama ng Magnitude 6.3 na lindol ang nasa 3,800 mga eskwelahan sa mga rehiyon ng Davao, Soccskargen, at Bangsamoro.
Ayon sa DepEd, nananatiling suspendido ang klase sa lahat ng antas sa tatlong (3) nabanggit na rehiyon.
Batay sa tala ng NDRRMC, lima (5) ang kumpirmadong nasawi sa pagtama ng malakas na lindol sa Mindanao kung saan tatlo (3) ang namatay dahil sa idinulot nitong landslide, isa ang nabagsakan ng gumuhong pader ng bahay at isa naman ang inatake sa puso.
Samantala, umaabot naman sa mahigit 300 mahihinang aftershocks na ang naitala ng Phivolcs sa rehiyon at inaasahang madadagdagan pa ang mga ito.
