Pabor si Senate President Vicente Sotto III sa hirit ng Department of Justice o DOJ na pansamantalang itigil ang muling pagpapaaresto sa mga convict na napalaya dahil sa GCTA o Good Conduct Time Allowance.
Ayon kay Sotto, tama lamang na itigil muna ang operasyon hangga’t hindi pa nasasaayos ang opisyal na listahan ng DOJ sa nakalayang convict.
Paliwanag ng senador, maraming posibleng dahilan ang hindi pagkakatugma ng listahan at bilang ng mga sumukong convict.
Isa na aniya rito ang hindi kumpletong listahan na ipinalabas ng BuCor o Bureau of Corrections.
Kasabay nito, kinalma ni Sotto ang mga convict at kanilang pamilya na nagagalit o sumasama ang loob dahil sa pagpapabalik sa mga ito sa kulungan matapos na makalaya.
“May mga ibang nagmamaktol at mga naiiyak na pamilya na pinalabas naman daw yung mga kamag anak nila ng maayos at nasa lugar. Wag ho kayong mag-alala. Pupursigihin ho namin yan na ilabas ho sila ulit basta yung mga legitimate whether nagbayad o hindi basta legitimate sila lumabas, dapat palabasin na. Pero yung mga hindi qualified, yung mga illegally released katulad ng involve sa heinous crimes, yung recidivist na nagsuhuluan kaya nakalabas ay hindui makakalabas yun,” ani Sotto — sa panayam ng Usapang Senado
