Dumating na si Pangulong Rodrigo Duterte sa Japan para sa kanyang 2-day official visit.
Pasado alas-2:00 ng madaling araw oras sa bansa nang lumapag ang eroplano ng Pangulo sa Haneda International Airport.
Kasama ng Pangulo ang kanyang partner na si Honeylet Avanceña at kanilang anak na si Kitty.
Bitbit din ng Pangulo sa kanyang biyahe ang ilan sa miyembro ng gabinete gayundin ilang opisyal ng militar at mga sundalo na lumaban para sa pagbawi ng Marawi City.
Kumpiyansa ang Pangulo na magiging produktibo ang kanyang dalawang araw na pagbisita sa Japan.
Sa departure speech sa Davao City International Airport kagabi, sinabi nitong kabilang sa kanilang pag-uusapan ni Japanese Prime Minister Shinzo Abe ay ang pagkakaroon ng pagkakaisa at seguridad sa rehiyon gayundin ang taripa na ipinapataw sa mga produkto ng Pilipinas.
Naniniwala rin ang pangulo na magiging malaki ang papel ng Japan sa rehabilitasyon ng Marawi City.
Samantala, sa kanyang ikalawang pagbisita sa Japan ay umaasa ang Pangulo na makaharap si Emperor Akihito bago man lamang ito bumaba sa puwesto.
—-
