Hindi magbibitiw sa pwesto si Pangulong Rodrigo Duterte.
Ito ang ginawang paglilinaw ng Malacañang matapos magpahayag ang pangulo ng kagustuhan nitong magresign na dahil sa hindi matigil umanong korapsyon sa pamahalaan.
Ayon kay Presidential Spokesman Harry Roque, gugugulin pa rin ng pangulo ang kaniyang dalawang taong termino sa paglilinis ng mga tiwaling opisyal sa iba’t ibang ahensya ng gobyerno.
Hindi na rin umano bago ang pahayag na ito ng pangulo na pagbibitiw sa pwesto.
Ani Roque, dati na itong sinasabi ng pangulo dahil sa tagal na niya sa pwesto at sa paglaban sa korapsyon ay tila wala namang nangyayari.
Binibigyan umano kasi ng prayoridad ng pangulo ang paglaban sa korapsyon kaya naman nalulungkot ito na tila walang nagbabago.
Halimbawa na lamang kasi aniya ay ang pagbibigay ng mga kinakailangan permit na wala namang dapat discretion; iyong permits umano para sa telco; mga permit para sa rehistro; ay hindi na dapat pinatatagal.
Kapag kasi umano tumagal pa ito ibig sabihin ay may humihingi pa ng patong.
