Tatanggalin na sa Department of Social Welfare and Development ang pangangasiwa sa pondo para sa mga senior citizens.
Ayon kay Senior Citizens Partylist Representative Jun Datol, inaasahang maitatatag na sa susunod na taon ang National Senior Citizens Commission na kamakailan ay isinabatas ni Pangulong Rodrigo Duterte.
Sa ilalim ng batas, ang komisyon ay ilalagay sa ilalim ng tanggapan mismo ng pangulo at magkakaroon ng isang chairman at anim na commissioners.
Tatanggalin na rin sa mga alkalde ang kapangyarihan na magtalaga ng mamumuno sa lokal na OSCA o Office of Senior Citizens Affairs.
Ang akin po talagang pakay dito ay hindi mapulitika ang mga senior citizen. Hindi naman po lahat ng mga local government unit, yung mga mayors na nag o operate ng OSCA at yung DSWD, pinipili lang po nila yung makakatanggap ng pensyon. Pag yun po ang ginagawa ng mga leaders kahit na mga mayayaman may pension na sa SSS at GSIS, aba ay nakakatanggap pa ng pensyon sa national.
Ayon kay Datol, tinitiyak rin ng batas na magiging pantay pantay ang benepisyo para sa mga senior citizens at matanggal na ang anomalya.
Unti unting inaalis ng Office Senior Citizen Affairs yun pong may mga kaya na tumatanggap po ng pension sa mga national. Yung iba po nakatira sa subdivision, aba yung iba kahit patay na, tumatanggap pa ng pensyon! Yung iba may double name kaya ngayon iniimbestigahan yan ng ating pamahalaan, at kung sino ang tatamaan sa mga anomalyang yan, ay pasensyahan na po. — Pahayag ni Senior Citizens Partylist Representative Jun Datol