Binabatayan ng Philippine National Police o PNP ang galaw ng mga private armed groups ngayong papalapit na ang panahon ng halalan para sa susunod na taon.
Ayon kay PNP Chief P/Gen. Guillermo Eleazar, may listahan sila ng mga Private Armed Group o PAGs na nagiging aktibo lamang sa tuwing sumasapit ang panahon ng halalan at mahigpit nila itong tinututukan.
Umingay ang usapin ng private armed groups kasunod ng mungkahi ni Pangulong Rodrigo Duterte na bigyan ng armas ang mga civilian anti-crime group para makatulong sa paglaban sa krimen.
Una rito, nagpahayag ng pangamba ang ilang grupo tulad ng Pambansang Lakas ng Kilusang Mamamalakaya ng Pilipinas o PAMALAKAYA na posibleng magamit bilang private armies ng mga pulitiko ang mga civilian volunteers para itumba ang kanilang mga kalaban sa pulitika. —ulat mula kay Jaymark Dagala (Patrol 9)
