Itinanggi ng Malacañang na may kinalaman sa paghahanda sa Asia Pacific Economic Cooperation Summit sa Nobyembre ang maagang paglilinis sa mga palaboy at street vendor sa Roxas Boulevard, Maynila.
Ito ang inihayag ni Dep. Presidential Spokesperson Abigail Valte matapos hakutin at walisin ng mga tauhan ng Department of Social Welfare and Development at mga taga-city hall ang mga palaboy sa Roxas Boulevard.
Ayon kay Valte, bahagi ng modified conditional cash transfer program ng DSWD ang pagpapa-alis sa mga palaboy at hindi sa dahilang masakit sa mata ang mga ito.
Aminado ang opisyal na hindi lahat ay pumapasa sa program ng kagawaran habang ang iba naman ay bumabalik sa lansangan kahit tinutulungan na ng pamahalaan.
Magugunitang nilinis din ng DSWD ang Roxas Boulevard nang bumisita sa bansa si Pope Francis noong Enero at dinala ang mga palaboy sa isang resort sa Batangas.
By Aileen Taliping / Drew Nacino
