Tiwala ang Malakanyang na magtatagumpay ang kauna-unahang blended learning mode sa bansa sa gitna ng COVID-19 pandemic.
Ito ang inihayag ni Presidential Spokesperson Harry Roque, sa kabila ng nararanasang problema sa mahinang internet signal sa ilang lugar sa bansa.
Ayon kay Roque, bagama’t alam niyang hindi magiging perpekto ang pagbubukas ng klase ngayong taon, tiwala naman siyang napaghandaan ng pamahalaan ang posibleng problema kinahaharap nito.
Sinabi ni Roque, wala aniyang dapat ipag-alala kung mahina ang internet connection sa ilang lugar dahil gagamit din naman aniya ng modules, telebisyon at radyo sa paghahatid ng mga leksyon.
Tinatayang nasa 22.5 milyong mga estudyante sa mga pampublikong paaralan ang nagbalik eskwela para sa kauna-unahang blended learning mode sa bansa sa gitna ng covid-19 pandemic.
